රිදීකන්ද ආරණ්‍ය සේනාසනය

මිහිඳු මහ රහතන් වහන්සේගෙන් ඇරඹුණු ලක්දිව ථෙරවාද බුදුසසුන අද දක්වා නොනැසී පවත්වා ගෙන එන ගමනේදී, වළගම්බා රජ සමයේ බැමිණිටියා සාය නම් අතිශය දරුණු සාගතය නිසා එතෙක් වාචෝද්ගතව පවත්වාගෙන ආ තෙවළා බුදුවදන අභාවයට යා නොදී, කඳු රටට වැඩම කොට පෙළ දහම වාචෝද්ගත කොට අස්වසමින් රැක ගැනීමට දිරි දැරූ ඒ මහා සංඝරත්නය, මාතලේ අළු විහාරයේ දී ධර්මයේ චිරස්ථිතිය පිණිස ත්‍රිපිටකය ග්‍රන්ථාරූඪ කළහ. එවන් සංඝ පරපුරකින් පෝෂණය වූ භික්ෂු පරම්පරාවක් ලෙස උත්තම ශාසනයේ ප්‍රතිපත්තිගරුකව කටයුතු කරමින් ආරණ්‍යය වාසීව වැඩසිටින භික්ෂුන් වහන්සේලා මෙම රිදීකන්ද ආරණ්‍යය සේනාසනය තුළ වැඩසිටියි. තමන් වහන්සේලාගේ අධ්‍යාත්මික ගුණ වගාවන් වර්ධනය කරගනිමින්, ධර්ම මාර්ගය තුළ ගමන් කරන භාවනායෝගීන්ටත් මාර්ගෝපදේශනය ලබා දෙමින්, බුද්ධ දර්ශනය මෙරට මෙන්ම ජාත්‍යන්තරය තුළද ප්‍රචලිත කිරීමේ වටිනා ශාසන මෙහෙවරයක වර්තමානය තුළ කටයුතු කරමින් වැඩ වාසය කරයි.

ත්‍රිපිටක ගත ධර්ම විනය මනාකොට අධ්‍යයනය කොට එය ප්‍රායෝගිකව ක්‍රියාත්මක කරමින්, බුද්ධ දර්ශනයේ ඉදිරිපත් කරන උතුම් ඵල නෙළාගැනීමේ ක්‍රමානුකූල මාර්ගයක ගමන් කිරීම පිණිස රිදීකන්ද ආරණ්‍යය සේනාසනය ධර්මකාමීන්ට මාර්ගෝපදේශනය ලබා දෙයි. බුද්ධ දර්ශනයේ හර ධර්මතා, සිද්ධාන්ත මනා කොට විවරණය කොට ලබා දෙන්නා වූ ධර්ම දැනුම, ප්‍රායෝගිකව භාවනා කර්මස්ථානයන් නිර්දේශ කරමින් ප්‍රත්‍යක්ෂ අවබෝධයන් කරා කෙනෙකු ගෙන ඒම රිදීකන්ද ආරණ්‍යය සේනාසනයෙහි සුවිශේෂීත්වයයි. ප්‍රත්‍යක්ෂ අවබෝධයන් සඳහා උපකාරක ධර්මතා වූ සමථ සහ විදර්ශනා භාවනා දර්ශනයන්ගෙන් සමන්විතව එක් එක් භාවනායෝගියාගේ වර්ධනය මත පදනම් වූ ඉගැන්වීම් සහ මාර්ගෝපදේශයන් ලබා දීමෙන්, නිවැරදිව පියවරෙන් පියවර කෙනෙකුට ආර්ය මාර්ගයේ ගමන් කිරීමට අවකාශ සලස්වයි.